Shkak i mos mbajtjes së kësaj seance, e paraparë për të mërkurën, në Gjykatën Themelore në Prishtinë, ka qenë mungesa e vet të akuzuarit Ferizi.
Gjykatësja Naime Krasniqi-Jashanica, ka deklaruar se nga fletëkthesa, është vërtetuar se adresa e dhënë në aktakuzë nuk është e plotë.
Për këtë arsye, gjykatësja Krasniqi-Jashanica, ka deklaruar se të akuzuarit do t’i dërgohet përsëri ftesë, me kërkesë nga Policia e Kosovës që të vërtetojë adresën e saktë të të akuzuarit.
Seanca e ardhshme për këtë rast, është caktuar të mbahet më 11 maj 2018, me fillim nga ora 11:00, raporton betimiperdrejtesi.com
Sipas aktakuzës së Prokurorisë Themelore në Prishtinë, e ngritur më 25 janar 2018, Gëzim Ferizi, në cilësinë e inxhinierit të arkitekturës në Drejtorinë e Urbanizmit në Prishtinë, ka keqpërdorur detyrën e tij zyrtare, me ç’rast Komunës së Prishtinës i kishte shkaktuar dëm të konsiderueshëm material.
Sipas aktit akuzues, i akuzuari Ferizi kishte nxjerr dy aktvendime të lejeve ndërtimore, por që pjesa tekstuale nuk përkonte me pjesën grafike.
Ai akuzohet se më 22 mars 2013, kishte përpiluar aktvendimi e parë të lejeve ndërtimore për ndërtimin e objekteve afariste në objektin “A” dhe “C” në lagjen “Mati 1”, në Komunën e Prishtinës, ku investitor në këtë objekt është Latif Brajshori.
Kurse, sipas aktakuzës, më 10 qershor 2013, kishte nxjerrë aktvendimin e dytë për lejen e ndërtimit për objektin “B”, po në këtë lagje, ku investitor është “NNH Morina Ib”.
Ai akuzohet se pjesa tekstuale e lejes ndërtimore nuk përputhet me pjesën grafike, e që në pjesën grafike, sipas aktakuzës, kishte përfshirë edhe ngastrën kadastrale 741/14, e cila rrugë evidentohet në emër të Komunës së Prishtinës.
Në bazë të aktakuzës, kjo rrugë kishte qenë rrugë publike e pa kategorizuar, ndërsa me anë të këtyre lejeve, iu ishte mundësuar investitorëve ndërtimi i objekteve afariste.