Vuçiq për Ushtrinë e Kosovës: Me Rezolutën 1244, vetëm Serbia dhe KFOR-i mund të kenë trupa ushtarake në Kosovë

Presidenti i Serbisë, Aleksandar Vuçiq, është shprehur edhe njëherë kategorikisht kundër formimit të Ushtrisë së Kosovës, duke thënë se një gjë e tillë nuk lejohet sipas marrëveshjes së Kumanovës.

Duke u përgjigjur në interesimin e mediave nëse ndihmëssekretari i SHBA-së, Wess Mitchell, ka sjellë planin katër pikësh për Kosovën në Beograd, gjë të cilën diplomati amerikan e ka mohuar, presidenti serb Vuçiq deklaroi se sipas marrëveshjes së Kumanovës Kosova nuk mund të ketë Ushtri.

“Iu bëj thirrje të gjithëve të gjejnë një letër të vetme, një shkronjë të vetme në ndonjë akt ndërkombëtar në të cilin shkruhet se është e lejuar. Sipas marrëveshjes teknike-ushtarake nga Kumanova, kurrfarë forcash kosovare nuk mund të ekzistojnë – mund të ekzistojë KFOR-i dhe askush tjetër. Sipas Rezolutës 1244, nuk parashihen forca shqiptare, por kthim të forcave serbe në Kosovë. Ushtria e Kosovës është në kundërshtim me të gjitha kartat ndërkombëtare”, tha Vuçiq.

Ky reagim i Vuçiqit erdhi pas deklaratës së ndihmëssekretarit të SHBA-së, Wess Mitchell, sot në Beograd se Kosova ka të drejtë të ketë Ushtrinë e saj.

Lini Një Koment