Futbolli italian në kaos, pezullohet Serie B

Futbolli italian ka hyrë sërish në kaos pasi është pezulluar Seria B deri në një njoftim të radhës.

Një përballje ligjore e re, se a duhet të jenë 19 skuadra apo 22 pjesëmarrëse në këtë ligë, ka shkaktuar kaosin.

Më herët gjatë muajit, u vendos se liga vazhdon me 19 ekipe, pasi tri skuadra kishin shpallur bankrotimin. Problemi detyroi që Bari, Avellino dhe Cesena të largohen nga liga.

Gjithsesi, ekipet e ligës së tretë, Siena, Novara, Catania, Ternana dhe Pro Vercelli, protestuan duke thënë se e meritojnë ngritjen një ligë më lartë.

Rasti ka zgjatur për disa javë, por u mendua se është vendosur përfundimisht kur Komiteti Olimpik Italian tha se kërkesa e këtyre ekipeve ishte e papranueshme. Por një ankesë e Pro Vercellit ka bërë që Tribunali të pezullojë vendimin e Komitetit Olimpik.

Tani është vendosur që të pezullohen të gjitha ndeshjet në të dy ligat deri në një vendim përfundimtar, që pritet të merret më 9 tetor.

Lini Një Koment