Një shkëmbim zjarri ka ndodhur sot në Prishtinë mes Policisë dhe Kosovës dhe disa personave.
Këtë për lajmi.net e ka konfirmuar edhe zëdhënësi i Policisë, Agron Borovci.
Ai ka bërë të ditur se deri tek rasti ka ardhur pas që disa persona kanë shpërfillur urdhërin për ndalje të Policisë.
“Ne kuadër te masave taktiko-operative që policia e rajonit të Prishtinës po ndërmerr për kapjen e të dyshuarve të implikuar në veprat penale si dhe goditjen e grupeve kriminale brenda rajonit te Prishtinës, sot rreth orës 21:00 përderisa policët ne rroba civile kanë provuar të ndalojnë një veturë të dyshuar me tre persona në lagjen “Arberia” në Prishtine, të njëjtit kanë shpërfillur urdhërat e policisë per tu ndalur, duke filluar ta godasin në vazhdimesi me veturën e tyre në levizje dhe nje nga ta i ka drejtuar armen policëve të cilët në atë moment duke vlerësuar rrezikun e drejteperdrejt për jetën e tyre kanë përdorur armën për të neutralizuar veprimet e rrezikshme të të dyshuarve që atë moment kanë mund të jenë fatale per jeten e policëve”, ka thënë ai.
Borovci po ashtu ka bërë të ditur se pas shkëmbimit të zjarrit, policia ka filluar ndjekjen e të dyshuarve ku edhe janë arrestuar dy persona.
I dyshuari i tretë ka ikur nga vendi i ngjarjes, teksa i njëjti është i njohur për policinë lidhur me disa vepra penale.
Po ashtu, bëhet e ditur se disa oficerë policorë janë lënduar.
“Ndërkohë qe ka vazhduar ndjekja dhe është shtuar mbështetja policore, është bere i mundur ndalimi i detyruar i vetures së dyshuar ne lagjen “Përroi i Njelmët” në Prishtinë si dhe kapja dhe arrestimi i dy të dyshuarve të ketij rasti. I dyshuari i trete ka arritur të ike nga vendi i ngjarjes dhe aktualisht është në arrati, porse i njëjti është identifikuar dhe është në kërkim policor. Ky i dyshuar i njohur për policinë ka qenë edhe më herët në kërkim policor për raste te grabitjes dhe plagosjes te ndodhura kohë me parë. Ne veturën e dyshuar policia ka gjetur dhe sekuestruar nje revole te kalibrit 7.65 mm me 6 fishek, një shufër metalike, një sasi substance qe dyshohet të jetë marihuane, si dhe disa telefona celular. Oficerët policor kanë marrë lëndime trupore pergjatë ndjekjes nga goditja e veturave, perderisa deri më tani nuk raportohet për të lenduar nga arma e zjarrit. Operacioni per lokalizimin e vendndodhjes së të dyshuarit të tretë është duke vazhduar përderisa të arrestuarit konform rekomandimit të prokurorit të shtetit do të procedohen mëtej në procedurë hetimore”, ka thënë tutje ai.