Kryetari i Forumit për Marrëdhënie Etnike, Dushan Janjiq, po e sheh si të rrezikshme tendencën e serbëve për të bojkotuar zgjedhjet e parakohshme në katër komunat veriore të Republikës së Kosovës.
Sipas tij është e vështirë që të parashikohet se si do të shkojë i gjithë procesi tutje. Ndërkohë sot nënkryetari i ‘Listës Serbe’, ka thënë se pasi të takohen me presidentin Aleksander Vuçiq, do të vendosin nëse do të marrin pjesë në këto zgjedhje.
Sipas Janjiq, zgjedhjet e parakohshme mund të jenë një akison i organizuar nga Shtetet e Bashkuara të Amerikës, dhe është në dorën e Vuçiqit nëse do të bëj thirrje për bojkot të tyre.
“Mundësia e parë është se kjo është pjesë e një aksioni të gjerë për të cilin Beogradi është informuar dhe që është i koordinuar nga ana e administratës amerikane. Presidenti i Serbisë, Aleksandar Vuçiq tani do të detyrohet të vendosë nëse do të bëjë thirrje për bojkotin e këtyre zgjedhjeve”, i ka thënë Janiq agjencisë së lajmeve të Beogradit, Beta.
Ai megjithatë konsideron se nuk do të ketë thirrje për bojkot, meqë një veprim i tillë, sipas tij “do të kthente gjithë kritikën e bashkësisë ndërkombëtare nga Serbia e serbët, si fajtorë që kanë shkelur Marrëveshjen e Brukselit, kurse Marrëveshja parasheh pjesëmarrjen në institucionet e Kosovës”.
Deri në maj, përkatësisht deri me shpalljen zyrtare të zgjedhjeve, nuk duhet të pritet ndonjë qëndrim përfundimtar i Serbisë për ato zgjedhje, ka thënë ai duke shtuar se është gati e sigurt se Beogradi do të fshehë hapat e vet të ardhshëm deri sa kjo të jetë e mundshme
Është një moment kur autoritetet e Kosovës mund të thonë se si ia dalin të sigurojnë zbatimin dhe respektimin e ligjeve të Kosovës në gjithë territorin e Kosovës, dhe pastaj të heqin taksën ndaj produkteve serbe dhe të BeH. Në rast të një rendi të tillë veprimesh, do të krijoheshin kushtet që të vazhdojnë përgatitjet për ringjalljen e dialogut, që do të ishte gjë e mirë për të gjithë, edhe për bashkësinë ndërkombëtare, edhe për Prishtinën, edhe për Beogradin”, ka shtuar ai.
Opsioni tjetër është zvarritja e tërë procesit dhe shtyrja e zgjedhjeve, që do të mund të shkaktonte rritje të destabilitetit dhe nervozë ndër serbët në veri të Kosovës.
Opsioni i tretë është acarimi serioz, me rrezik të tensioneve e të konflikteve, por sipas Janjiqit një zgjidhje e tillë është më së paku e pritshme dhe se në këtë moment nuk sheh interes as të Beogradit, as të Prishtinës që situata të përshkallëzojë sa të shndërrohet në përplasje.
“Është fakt se radikalizimi gradual mund të çojë nga inidentet, por në këtë moment nuk shoh interes as të Beogradit, as të Prishtinës që të ndodhë diç e tillë”, ka përfunduar ai.
