Kryeprokurori i Gjykatës Speciale të Kosovës zotohet për hetim të paanshëm

Kryeprokurori i ri i një përpjekjeje ndërkombëtare për të sjellë para drejtësisë ata që janë përgjegjës për mizoritë gjatë luftës së Kosovës për pavarësi u zotua të enjten për të kryer hetimet e tij “pa frikë apo favorizime”. David Schwendiman, një ish-prokuror federal i SHBA-ve i cili ka punuar edhe në Bosnje dhe Afganistan, u tha gazetarëve se ai është “i vetëdijshëm për ndjeshmërinë politike të asaj që është duke bërë”, por theksoi; “Unë do të udhëzohem vetëm nga faktet dhe ligji”.

Schwendiman mbajti konferencën e tij të parë për shtyp që nga emërimi i tij më 1 shtator si prokuror kryesor i Dhomave Speciale të Kosovës, degë e ndarë e gjykatave të Kosovës që do të ketë selinë e saj në Hagë, Holandë. Schwendiman është duke hetuar akuzat e bëra në Këshillin e Evropës të vitit 2010 që raportojnë se anëtarë të lartë të Ushtrisë Çlirimtare të Kosovës (UÇK), duke përfshirë edhe presidentin aktual të Kosovës Hashim Thaçi, kanë udhëhequr qendrat e paraburgimit ku të internuarit civilë duke përfshirë edhe serbët u vranë dhe organet e tyre shiten në tregun e zi gjatë luftës së Kosovës për pavarësi nga Serbia në vitet 1998-99. Thaçi mohon pretendimet shkruan New York Times, transmeton “zeri.info”.

Ndërsa Këshilli i Evropës emërtoi të dyshuarit që pretendohet se ishin të përfshirë në mizori të tilla, Schwendiman tha se nuk do të identifikojë të dyshuarit deri sa të jetë i gatshëm për të ngritur akuza. “Ju do të kuptoni kur dikush do të jetë akuzuar, kur një aktakuzë apo padi penale kundër tyre të bëhet publike”, tha ai. Zyrtarja e gjendjes civile të gjykatës, Fidelma Donlon, tha se synon të fillojë “aktivitetin gjyqësor” në gjysmën e parë të vitit të ardhshëm, përcjell “zeri.info”.

Çelësi i suksesit të gjykatës së re do të jetë aftësia e saj për mbrojtjen e dëshmitarëve të gatshëm për të dëshmuar. Përpjekjet e Kombeve të Bashkuara për të ndjekur penalisht ish-luftëtarë të UÇK-së për krime, duke përfshirë vrasjet dhe torturat ishin kryesisht të pasuksesshme për shkak të asaj që gjyqtarët e kanë quajtur si frikësim të gjerë të dëshmitarëve. Donlon tha se gjykata do të “zbatojë standardet më të larta të mbrojtjes” për dëshmitarët dhe të tjerët të përfshirë në gjyqe. “Kjo është diçka që ne kemi marrë shumë seriozisht”, tha ajo.