LR-PDSH: Diaspora nuk guxon të fshihet!

Në vazhdim e keni të plotë tekstin e konferencës së sotme për media mbajtur nga nënkryetari i LR-PDSH Agon Ferati:
Kemi thirrur këtë konferencë për shtyp për të ndarë informacione të rëndësishme me opinionin publik, njëkohësisht për të bërë distinkcion të qartë mes votuesve fiktiv dhe diasporës, dy kategori të ndryshme që nuk përkojnë me njëra-tjetrën dhe nuk guxon që edhe mëtej të trajtohen si e njëjta gjë.
Lëvizja për Reforma PDSH në vazhdimësi ka apeluar për vëmendje më të madhe të aktorëve politik shqiptar pjesëmarrës në negociata, për angazhim më të madh dhe mbrojtje të votuesve shqiptar, dhe asesi të bëhen palë me manipuluesit.
Nga procesverbalet e mbledhjeve të KSHZ-së, kemi selektuar dy momente të rëndësishme që kanë ndodhur në muajin Mars dhe Prill të vitit 2016, jo rastësisht do të citojmë pushtetin, ish-deputeten e VMRO-DPMNE-së, aktualisht anëtare e KSHZ-së Silvana Boneva, e cila konfirmon ekzistimin e votuesve fiktiv duke potencuar se: “mbi 300.000 votues janë jokonzistentë dhe nuk gjenden në bazën e të dhënave të institucioneve të kontrolluara”, citat i nxjerur nga procesverbalet e KSHZ-së. Të njëjtën e konfirmon edhe grupi i ekspertëve ndërkombëtar IFES, të cilët në Raportin e tyre kanë potencuar që në Listat e votuesve ekzistojnë 330.558 votues fiktiv, që nuk mund t’i gjejnë në asnjë databazë të institucioneve që kanë kontrolluar. Ky Raport është votuar unanimisht nga të gjithë anëtarët e KSHZ (gjithsej 9 anëtarë) dhe kjo është e dokumentuar, ndërsa këtë e konfirmon edhe Boneva në një procesverbal tjetër të mbledhjes së KSHZ-së, citojmë: “9 anëtarët e KSHZ-së jemi dakorduar që ky numër duhet të verifikohet”.
Por pas kësaj pason heshtja në KSHZ, për të fshehur manipulimin disavjeçar me Listat zgjedhore, “hidhet në treg” teza për 172.500* votuesit e nënvizuar me yll dhe 40.000 të tjerëve të cilët kryesisht kanë të bëjnë me diasporën shqiptare, për të cilën LR-PDSH vlerëson se nuk ka asgjë kontestuese, dhe nuk mund të ju merret e drejta për votim, që është e garantuar me Kushtetutë.
Për të sqaruar më mirë këtë manipulim të pushtetit dhe KSHZ-së, apelojmë deri tek grupi ndërkombëtar i ekspertëve të IT-së (IFES) të cilët realizuan procesin e verifikimit të votuesve, që të publikojnë Raportin në opinion dhe të zbardhin të vërtetën, duke ndihmuar kështu krijimin e kushteve për zgjedhje fer dhe demokratike; dhe zgjedhjen e një shumice të re parlamentare me legjitimitet të pakontestuar.

Lini Një Koment

Shiko t'gjithë komentet

Veq Lexuesit e regjistruar mund të komentojnë