Ngjarja e të miturës nga Drenasi ka ngjallur reagime të shumta në opinion. Ekskluzivisht me këtë rast po merret edhe kryeministri i Kosovës, Ramush Haradinaj. Ai ka ftuar ministrin e punëve të brendshme dhe atë të arsimit që të vihet drejtësi për këtë rast.
Mirëpo, në takim kanë munguar ministri i Ministrisë së Drejtësisë, Abelard Tahiri dhe ministri i Ministrisë së Shëndetësisë, Uran Ismaili, pavarësisht se në këtë rast ishin të përfshirë edhe personeli i sektorit të shëndetësisë.
Që të dy ministrat janë nga radhët e PDK-së. Kjo nuk është hera e parë që kryeministri Haradinaj shpërfillet nga pjesëtarët e kabinetit të tij. Kohë më parë ai ishte ankuar edhe në ministrin e Ministrisë së Zhvillimit Ekonomik, Valdrin Lluka, i cili nuk kishte marrë pjesë në një mbledhje të kabinetit qeveritar ku flitej për tërheqjen e investimeve të huaja. Asokohe, Haradinaj kishte kritikuar publikisht Llukën, njofton KosovaPost.
“Sot, kam pritur në takim pune Ministrin e Brendshëm Ekrem Mustafa, Ministrin e Arsimit, Shyqeri Bytyqi, Drejtorin e përgjithshëm të Policisë Rashit Qalaj, Kryeshefen e Inspektoratit Policor Miradie Kelmendi dhe Kryeinspektorin e Arsimit Defrim Gashi, nga të cilët kërkova që të ndërmerren të gjitha veprimet, bazuar në ligjet e Kosovës, për ta zbardhur të vërtetën dhe për t’i nxjerrë para drejtësisë, të gjithë ata që kanë kryer vepër të jashtëligjshme në rastin e të miturës nga Drenasi.
Institucionet e vendit, Prokuroria dhe Gjykata, duhet të dëshmojnë fuqinë e vet në zbatim të ligjit.
Rasti i abuzimit seksual të të miturës nga Drenasi, duhet të trajtohet në kohë dhe me profesionalizëm nga të gjitha institucionet e vendit.
Njëkohësisht, kërkoj nga të gjitha mekanizmat institucional dhe shoqëror, që të bashkërendojnë politikat dhe aktivitetet, me qëllim të parandalimit të rasteve të tilla në të ardhmen”, ka shkruar kryeministri Haradinaj.
