Policia po e heton vdekjen e 38 vjeçarit që doli nga burgu për ta shfrytëzuar fundjavën

Sot gjatë orëve të hershme të mëngjesit ka ndërruar jetë Murat Mehmeti, i cili vuante dënimin në Smrekonicë për “Veprën Penale Vjedhje e Rëndë”. I dënuari ka ndërruar jetë gjatë kohës sa po shfrytëzonte vikendin, beneficione që i garantoheshin sipas legjislacionit në fuqi.

Shërbimi Korrektues i Kosovës ka njoftuar përmes një komunikate se sot ka ndërruar jetë i burgosuri Murat Mehmeti, 38 vjeçar. Vdekjen e të ndjerit e ka konfirmuar Policia e Kosovës sot rreth orës 05:15.

I burgosuri në fjalë, sipas legjislacionit në fuqi, kishte të drejtën e shfrytëzimit të beneficioneve dhe po shfrytëzonte vikendin e rregullt dy ditor në shtëpi, nga data 05.06.2019 deri më 07.06.2019.

Shërbimi Korrektues i kanë thënë Gazetës Express se Mehmeti ishte në vuajtje të dënimit për një vjedhje që e kishte kryer para dy vitesh. Sipas SHKK’së, lirimi i tij pritej të bëhej vitin e ardhshëm.

“I dënuari po vuante dënimin në Qendrën Korrektuese në Smrekonicë. Ai ishte dënuar për “Veprën Penale Vjedhje e Rëndë” dhe ishte i dënuar me burgim në kohëzgjatje prej 2 vjet e 2 muaj. Ndërsa për vuajtjen e dënimit ishte paraqitur vullnetar në Dubravë më 12.12.2017” ka konfirmuar Gashi për Gazetën Express.

Shkaqet e vdekjes ende nuk janë konfirmuar, por me rastin në fjalë po merret Policia e Kosovës.

Lini Një Koment