Një djalosh trevjeçar ka mbijetuar i vetëm për tri ditë në një zonë të largët malore në rajonin rus të Siberisë, duke iu rezistuar temperaturave pothuajse ngrirës dhe zonës malore me ujq dhe arinj.
Një kërkim i madh kishte nisur për ta gjetur vogëlushin e quajtur Tserin Dopchut i cili ishte zhdukur duke luajtur me qentë e vet afër shtëpisë në fshatin e vogël Khut, transmeton Express.
Tserin nuk kishte pallto të veshur dhe mbante me vete vetëm një çokollatë kur ishte zhdukur më 18 shtator.
Më shumë se 100 njerëz u angazhuan për kërkimin e tij, përfshirë dhe policinë dhe ekipet e shpëtimit të ministrisë ruse të Emergjencave, raporton Siberian Times.
Edhe një helikopter ishte përdorur për të eksploruar këtë zonë 120 kilometra katror.
Vogëlushi u gjet këtë të mërkurë pasi kishte njohur zërin e xhaxhait të vet duke e thirrur atë.
Ai kishte mbijetuar duke e ngrënë çokollatën dhe ishte strehuar në një zonë të tharë nën një pemë.
