Prokuroria Themelore në Gjilan, Departamenti i Përgjithshëm, ka ndaluar tre persona, për shkak të dyshimit se kanë kryer veprën penale ‘’Shantazhi’’.
Organi i akuzës ka thënë se ekziston dyshimi i bazuar që të dyshuarit M.K. dhe F.K., gjatë muajit nëntor 2018, në Gjilan, me qëllim të përfitimit të kundërligjshëm pasuror për vete, shkruan gazetametro.net.
Siç mësohet, të dy të dyshuarit kanë shantazhuar të dëmtuarin E.E., duke kërkuar nga ai 5.000 euro, ose në të kundërtën do t’ia publikonin një video incizim, me të cilin do të dëmtohej nderi dhe autoriteti i tij, pasi që e dyshuara kishte shkuar në ordinancën e të dëmtuarit, kinse për tu kontrolluar, pastaj iu ishte afruar duke e prekur në pjesë të ndryshme të trupit.
Të gjitha këto veprime ishin incizuar, e të cilat incizime më pas është provuar të bëhet shantazhi.
Siç thonë Prokuroria, me këto veprime kanë kryer veprën penale ‘’Shantazhi’’ nga neni 341 paragrafi 1 lidhur me nenin 31 të Kodit Penal të Republikës së Kosovës (KPRK).
Ndërsa, i dyshuari B.K., me dashje u ka ofruar ndihmë në kryerjen e veprës penale të dyshuarve të sipërshënuar, duke i’u ofruar automjetin dhe telefonin e tij, me ç’ rast për këto shërbime kishte marrë 100 euro.
Në këtë mënyrë i njëjti ka kryer veprën penale ‘’Ndihma në kryerjen e veprës penale Shantazhi’’, nga neni 341 paragrafi 1 lidhur me nenin 33 të KPRK-së.
Për këtë çështje, ndaj tre të dyshuarve është ushtruar kërkesa për caktimin e paraburgimit në kohëzgjatje prej 30 ditësh, në Gjykatën Themelore në Gjilan.
